Dağda temperatur bir gündə 20°C dəyişə bilər: Xızıda günorta 25°C, gecə 8°C. Bir qalın gödəkçə bu diapazonu ödəmir — tərləyirsən, sonra donursan. Həll üç qatdır və hər qatın öz vəzifəsi var.
1. Baza qat — təri bədəndən uzaqlaşdırır
Bədənə yaxın geyilir. Merino yun və ya sintetik. Vəzifəsi isitmək DEYİL — təri dəridən çəkib xaricə ötürmək.
2. Orta qat — istiliyi saxlayır
Polar (fleece) və ya yüngül puxovik. İstilik havanı tutmaqla yaranır, ona görə bir qalın qat yerinə iki nazik qat daha isti olur.
- Polar 100 — yay gecələri, sərin səhərlər
- Polar 200 — payız, yaz; ən çox işlənən sıxlıq
- Puxovik (700+ fill) — qış; yüngüldür, amma islananda istiliyini itirir
- Sintetik dolğu — islaq şəraitdə puxovikdən etibarlıdır
3. Xarici qat — külək və yağışı kəsir
Membranlı gödəkçə. İki rəqəmə bax: su sütunu (mm) və nəfəsalma (g/m²/24s). 10 000 mm / 10 000 g gündəlik trekking üçün kifayətdir; 20 000/20 000 davamlı yağış üçündür.
Praktik qayda
Yürüşə başlayanda bir qat AZ geyinin — 10 dəqiqədən sonra bədən qızır və artıq qatı çıxarmaq üçün dayanmaq lazım gəlir. Dayananda isə dərhal qat əlavə edin, tərləmiş bədən çox tez soyuyur.